Në Mannheim të Gjermanisë disa persona u plagosën nga një sulm me thikë gjatë një organizmi politik të ekstremit të djathtë. I plagosur ka mbetur edhe agresori i neutralizuar nga policia. Disa video gjatë momentit të sulmit bënë xhiron e rrjetit. Pamjet tregojnë një burrë shtyn një person në tokë dhe fillon ta godasë me thikë. Disa nga të pranishmit u përpoqën të ndalonin sulmin, por dështuan. Një polic më pas ndërhyri, por edhe ai mori plagë të rënda para se të mbërrinin oficerët e tjerë dhe të hapnin zjarr ndaj agresorit. Sipas asaj që raporton media gjermane “Bild”, një politikan dhe aktivist anti-islam ka mbetur i plagosur. Mësohet se politikani konservator dhe aktivisti anti-islam, Michael Sturzenberger ka qenë objektivi i këtij sulmi brutal, por lajmi ende i pa konfirmuar nga policia. Për ngjarjen reagoi edhe kancelari gjerman Olaf Scholz. "Dhuna e papranueshme në një demokraci" shkroi ai në rrjetet sociale. Ndërkaq, autoritetet kanë nisur një hetim të thellë për ngjarjen, për të shmangur panikun apo tensionet e panevojshme mes tifozëve që do të vijnë nga vende të ndryshme për Europianin 2024 që do të nisë në Gjermani më 14 qershor. Pamjet: AFP