Një operacion i gjerë kërkimi është shtrirë në të gjithë Berlinin pas sulmit gjatë aktivitetit të Krenarisë LGBTQ+ në qendër të kryeqytetit gjerman, ku një person humbi jetën dhe 16 të tjerë mbetën të plagosur. Policia e Berlinit ka identifikuar të dyshuarin si një 21-vjeçar me emrin Abdul B., i cili ende nuk është arrestuar. Autoritetet bëjnë të ditur se ai konsiderohet i rrezikshëm dhe mund të jetë i armatosur, ndaj qytetarëve u është kërkuar të mos i afrohen në asnjë rrethanë. Sipas policisë, i dyshuari përshkruhet si një person me trup të dobët, flokë të zinj, i veshur me një bluzë me kapuç ngjyrë të zezë dhe pantallona të bardha. Ai është rreth 1.90 metra i gjatë. Autoritetet dyshojnë se Abdul B. është personi që ka drejtuar një automjet në drejtim të turmës në zonën e parkut Tiergarten rreth orës 22:00 të së shtunës, duke plagosur disa persona. Policia bëri të ditur gjithashtu se një ose më shumë persona mund të jenë larguar nga automjeti pas ngjarjes. Si u zhvillua ngjarja – Rreth orës 22:00, policia njoftoi se një automjet i bardhë hyri në zonën e Tiergarten dhe goditi njerëzit e mbledhur pranë aktivitetit të Krenarisë. Disa prej të plagosurve u raportuan në gjendje të rëndë. Pas përplasjes, automjeti u përplas me një pemë dhe u gjet më vonë i braktisur brenda parkut. Policia rrethoi zonën dhe nisi kërkimin për personin ose personat përgjegjës. Aktiviteti i Krenarisë në Berlin u anulua, ndërsa pjesëmarrësve iu kërkua të largoheshin nga zona përmes Portës së Brandenburgut. Policia mbylli pjesë të parkut Tiergarten dhe nisi kontrolle intensive me mjete ajrore dhe kamera termike. Gjatë natës, rreth 30 persona u trajtuan në vendngjarje për shkak të gjendjes së shokut, sipas shërbimit zjarrfikës të Berlinit. I dyshuari – Në orët e para pas sulmit, policia njoftoi se kishte identifikuar një person si të dyshuar, i cili ishte i njohur për autoritetet dhe kishte lidhje me “skenën islamike” në Berlin. Zëdhënësi i policisë Florian Nath deklaroi se kërkimi për të dyshuarin vazhdonte me intensitet të plotë dhe se zona e kërkimit ishte zgjeruar nga Tiergarten në të gjithë qytetin. Policia po merr në pyetje dëshmitarët dhe u ka bërë thirrje qytetarëve të dorëzojnë çdo foto ose video që mund të ndihmojë hetimin. Raportimet – Në përditësimet e mëvonshme, policia bëri të ditur se disa persona raportohet se kanë pësuar plagë nga mjete prerëse gjatë incidentit. Autoritetet ende nuk kanë dhënë detaje të plota mbi rrethanat dhe nuk kanë konfirmuar motivin e sulmit. Reagimet politike – Kryetari i Bashkisë së Berlinit, Kai Ëegner, e cilësoi ngjarjen një “sulm ndaj shoqërisë sonë të lirë dhe të hapur”. “Berlin është një qytet i lirisë dhe sot liria jonë është sulmuar në mënyrën më të tmerrshme”, deklaroi Ëegner, duke shprehur mbështetjen për viktimat dhe ekipet e emergjencës. Edhe kancelari gjerman Friedrich Merz e dënoi ngjarjen, duke e cilësuar një “akt të tmerrshëm” dhe duke premtuar një hetim të plotë dhe ndëshkimin e autorit. Hetimet vijojnë – Policia e Berlinit vijon kërkimin për Abdul B., ndërsa ende mbeten për t’u sqaruar motivi i sulmit, nëse ka pasur persona të tjerë të përfshirë dhe rrethanat që çuan në përplasjen e automjetit me turmën. Parada e Krenarisë në Berlin, e njohur si Christopher Street Day, është një nga aktivitetet më të mëdha LGBTQ+ në Evropë dhe këtë vit kishte mbledhur mijëra pjesëmarrës në kryeqytetin gjerman.