Gjermania është tronditur sërish nga një sulm i ri me thikë. Këtë herë skena e dhunës ka ndodhur në Aschaffenburg (ashafenburg), në Bavari. Viktimat janë një djalë dy vjeçar dhe një burrë 41 vjeç, i cili u vetëflijua në përpjekje për të mbrojtur fëmijët. Tre persona të tjerë u plagosën: një 61-vjeçar, një vajzë siriane dhe një mësuese. Sipas shtypit gjerman, policia ka arrestuar një të dyshuar, një 28-vjeçar azilkërkues afgan, i cili dyshohet se ka tentuar të arratiset duke kaluar hekurudhat e qytetit. Burri, i cili vuante nga probleme mendore dhe me precedentë penalë, dyshohet se sulmoi me dashje fëmijët që ishin me edukatorët e tyre. “Aktualisht supozojmë se 41-vjeçari ka ndërhyrë me guxim për të mbrojtur fëmijët, ka luftuar kundër autorit dhe më pas është qëlluar për vdekje nga autori”, thanë autoritetet. Burri veproi me shumë guxim dhe në mënyrë shembullore, por fatkeqësisht e pagoi me jetë ndërhyrjen e tij, pas një goditje që ka marrë në qafë. Kalimtarë të tjerë e kanë ndjekur me guxim autorin dhe e kanë rrethuar atë derisa policia e kapi. Për ngjarjen reagoi edhe kancelari Olaf Scholz. "Një akt i pabesueshëm terrori në Bavari: mes të vdekurve ka edhe një fëmijë. Ngushëllimet tona shkojnë për viktimat dhe familjet e tyre,", ndërsa më pas kërcënoi se do të ketë masa të ashpra. “Unë jam lodhur duke parë akte të tilla dhune që ndodhin këtu çdo javë. Dhe këto bëhen nga njerëz që në fakt erdhën tek ne për mbrojtje. Autoritetet duhet të punojnë shumë për të zbuluar se pse sulmuesi ishte ende në Gjermani. Ne nuk duhet të mbajmë në vendin tonë njerëz me rekorde kriminale”, u shpreh Scholz.