Një sulm me thikë ka tronditur Berlinin, pas një incidenti të ndodhur pranë Memorialit të Holokaustit, në qendër të qytetit. Për fat të keq, viktima, një turist nga Spanja, ka mbetur në gjendje kritike dhe është dërguar menjëherë në spital. Arratisja e sulmuesit zgjati shumë pak, sepse u arrestua me shpejtësi nga forcat e rendit. Zëdhënësi i policisë bëri të ditur se sulmuesi nuk ka bërë rezistencë gjatë arrestimit dhe nuk ka lënë armën në vendin e ngjarjes. Hetimet janë duke vazhduar për zbardhjen e plotë të motiveve të sulmit, që është i treti pas atyre që ndodhën më 31 dhjetor dhe 22 janar, kur emigrantë sirianë goditën me thika kalimtarë të rastit dhe fëmijë në parkun e Berlinit. Memoriali i Holokaustit është një nga pikat më të vizituara të Berlinit dhe një vend simbolik për kujtimin e viktimave të Holokaustit. Aktualisht, zona është nën mbikëqyrjen e autoriteteve policore, dhe është shpallur e sigurt pas ndërhyrjes së menjëhershme. Kjo ngjarje shton tensionin në Gjermani, në prag të zgjedhjeve të parakohshme të së dielës, të cilat pritet të jenë vendimtare për të ardhmen e Gjermanisë, por edhe për atë të Evropës. Në qendër të debatit politik është veçanërisht partia e ekstremit të djathtë AfD.