Një djalë 14-vjeçar humbi jetën në Londër pasi u sulmua për vdekje nga një burrë 36-vjeçar në një stacion metroje të martën. Autori 36-vjeçar dyshohet se ka sulmuar turmën e njerëzve me shpatë, duke plagosur pesë persona. Mes tyre ishte edhe një djalë 14-vjeçar, i cili u dërgua në spital, por nuk arriti t’i mbijetonte plagëve të marra. Gjithashtu, dy punonjës policie janë shtruar në spital me lëndime të rënda, të cilët kanë nevojë për ndërhyrje kirurgjikale, por jeta e tyre është jashtë rrezikut. Autori 36-vjeçar u arrestua pas sulmit, pasi u pa duke ecur në rrugë me shpatë, sipas njoftimeve të policisë. Sipas videove të publikuara, i dyshuari shihej i veshur me rroba me ngjyrë të verdhë dhe duke tundur shpatën. “Me pikëllim të madh iu konfirmoj se një prej të plagosurve, një djalë 14 vjeç, ka vdekur. Ai u dërgua në spital, pasi ishte goditur, por vdiq pak kohë më pas”, tha shefi i policisë në Londër, Stuart Bell. Dy civilë të tjerë dhe dy policë po ashtu janë në spital me lëndime në trup. Megjithatë, policia deklaroi se dy policët e plagosur do t’i nënshtrohen ndërhyrjeve kirurgjikale. Autoritetet në Londër njoftuan se nuk ka më rrezik për komunitetin dhe nuk besojnë se ka të dyshuar të tjerë të përfshirë në këtë incident.