Dy gjermano-rusë janë arrestuar në Gjermani nën dyshimet për spiunazh. Njëri prej tyre akuzohet se është pajtuar të kryejë sulme ndaj caqeve potenciale, përfshirë edhe ndaj ndërtesave të ushtrisë amerikane, me qëllim që të sabotohet ndihma për Ukrainën. Të dyshuarit, të identifikuar si Dieter S. dhe Alexander J., u ndaluan të mërkurën në Bajrojt të Bavarisë, thanë prokurorët federalë. Dyshohet se Dieter S. kishte diskutuar për akte të mundshme sabotuese në Gjermani me një person të lidhur me inteligjencën ruse dhe se qëllimi kryesor ishte të minohej mbështetja ushtarake që Gjermani jep për Ukrainën. I dyshuari ishte deklaruar i gatshëm që të kryente sulme me bomba dhe zjarrvënie ndaj infrastrukturës të përdorur nga ushtria dhe ndërtesat industriale në Gjermani. Madje, ai kishte realizuar foto e video të pajisjeve dhe ndërtesave ushtarake dhe ia kishte dorëzuar inteligjencës ruse. Ndërsa Alexander J. dyshohet se ka ndihmuar që këto sulme t’i kryente më vonë. Gjermania është furnizuesja e dytë më e madhe, pas Shteteve të Bashkuara, e armëve për Ukrainën, pasi Rusia nisi pushtimin e shtetit fqinj mbi dy vjet më parë. SHBA-ja, ndërkaq, ka prani të madhe ushtarake në Gjermani.