Të paktën 40 persona u vranë dhe mbi 100 të tjerë u plagosën në një sallë koncertesh në veri-perëndim të Moskës. Agjencia e lajmeve Reuters njoftoi se persona të armatosur hynë në sallën e koncerteve “Crocus City Hall” afër kryeqytetit rus dhe qëlluan me armë automatike në drejtim të turmës që po ndiqte koncertin e grupit muzikor “Picnic”. Mbi 6 mijë veta kishin prerë biletat për të marrë pjesë në këtë aktivitet muzikor. Në pamjet e shpërndara në rrjetet sociale, shihen autorët të cilët hapin zjarr duke vrarë çdo person që hasnin para. Ndërkohë të gjithë të pranishmit vrapuan për t’I shpëtuar plumbave. Në një prej videove të filmuara nga dëshmitarët, shihen katër persona të armatosur duke qëlluar me breshëri plumbash hollin e lokalit dhe duke ekzekutuar çdo person që u dilte para pavarësisht thirrjeve për mëshirë. Shërbimi I inteligjencës ruse, sipas Reuters, tha se në këtë masakër morën pjesë të paktën pesë persona të cilët para se të largoheshin I vendosën dhe zjarrin çatisë së ndërtesës. Shumë ambulanca, makina policie si dhe zjarrfikëse u drejtuan drejt vendit të ngjarjes ku bën të mundur dërgimin në spital të të plagosurve. Por teksa policia u vendos në kërkim të autorëve, forcat zjarrfikëse mundën të vendosnin flakët nën kontroll pas disa orësh. Rasti fillimisht u raportua si një sulm nga ana e forcave ukrainase në disa media ruse, por një gjë e tillë u mohua nga zyra e presidentit Zelensky, që nënvizoi se Ukraina nuk ka dorë në këtë ngjarje. Edhe Shtëpia e Bardhë tha se po mbledh informacion lidhur me këtë çështje, ndërsa mohoi kategorikisht që Kievi të jetë përfshirë në këtë sulm vdekjeprurës. “Nuk ka asnjë indikacion për momentin se Ukraina apo ukrainasit janë përfshirë në të shtënat”, u tha gazetarëve zëdhënësi i Këshillit të Sigurisë Kombëtare, John Kirby. Por autoritetet ruse e quajtën ngjarjen një sulm terrorist ndërsa paralajmëruan se do të ketë pasoja vdekjeprurëse për këdo që e ka ndërmarrë një sulm të tillë të përgjakshëm. Pamjet; AFP