Sudani është bërë shteti i 119-të që ka njohur pavarësinë e Kosovës. Këtë të shtunë, Presidentja e Kosovës, Vjosa Osmani ka takuar Ministrin e Punëve të Jashtme të Sudanit, Ali Youssef el-Sharif i cili i ka dhënë njoftimin për njohjen. Në një video të publikuar në rrjetet sociale Osmani ka falenderuar Sudanin për njohjen. "Ishte nder dhe kënaqësi të takohem me Ministrin e Jashtëm të Sudanit, takimi i parë ku më informoi me instruksionet e Presidentit të Sudanit për të njohur Kosovën dhe për të thelluar bashkëpunimin diplomatik mes dy vendeve" Osmani takoi përfaqësuesin e shtetit të Sudanit në kuadër të Forumit Diplomatik të Antaials. Diplomati sudanez dhe presidentja Osmani kanë falenderuar edhe Presidentin e Turqisë, Recep Tayyip Erdogan, për Forumin. Presidentja e Kosovës u shpreh për njohjen se ky është fillimi i një parneriteti madhështor. "Nuk gjej fjalët e duhura për të shprehur mirënjohjen e popullit të Kosovës, popull shumë mirënjohës për këtë njohje, sepse nuk është vetëm njohje e pavarësisë, por është njohje e vështirësive që kemi kaluar dhe përpjekjeve për të qenë të lirë, të pavarur e sovranë. Në emër të popullit të Kosovës, faleminderit nga zemra dhe njëkohësit jini të sigurt që mund të mbështeteni në Republikën tonë si aleat dhe partner i Sudanit" Ministri i Jashtëm i Sudani i bëri ftesë presidentes Osmani për vizitë derisa tha se mezi pret thellimin e bashkëpunimit. "Jam i nderuar që përcjell mesazhin që populli i Sudanit njeh Kosovën si pjesë të komunitetit ndërkombëtar" Sudani, shtet ky në kontinentin e Afrikës, është shteti i radhës, pas Kenias që në pak javë njeh pavarësinë e Kosovës, gjë që u përcoll me kundërshtime nga ana e Serbisë.