Pothuajse dy milionë njerëz në Rusi dhe Ukrainë mbetën pa energji elektrike të hënën, si pasojë e erërave të forta në formë uragani, reshjeve të shiut dhe borës, që gjithashtu shkaktuan edhe përmbytje të mëdha. Moti ekstrem pothuajse ka paralizuar dhe luftimet mes Rusisë e Ukrianës. Në Detin e Zi, shpejtësia e erës arriti mbi 140 kilometra në orë, ndërsa në Rusi dhe Krime u raportuan edhe 4 viktima. Dy trupa u gjetën në rajonin jugor të Krasnodarit të Rusisë, ndërsa media shtetërore tha se një marinar u vra në ngushticën Kerç midis Krimesë dhe Rusisë. Viktima e katërt e raportuar ishte një burrë në bregun jugor të gadishullit të Krimesë të aneksuar nga Rusia. Ministria e Energjisë e Rusisë tha se rreth 1.9 milionë njerëz janë prekur nga ndërprerjet e energjisë në rajonet jugore të Dagestanit, Krasnodarit dhe Rostovit, si dhe në territoret e okupuara të Ukrainës në Donetsk, Lugansk, Kherson, Zaporizhzhia dhe Krime.