Mbretëria e Bashkuar është paralizuar nga stuhia “Goretti”, me erëra të forta, reshje intensive dëbore dhe ngrica, që kanë pushtuar gjithë vendin, duke çuar në pezullimin e shërbimeve hekurudhore, anulimin e fluturimeve dhe mbylljen e të gjitha shkollave. Situata me motin e keq pritet të përkeqësohet të dielën, pasi autoritetet kanë lëshuar paralajmërimin e verdhë, që do të hyjë në fuqi që pas mesnatës së të shtunës dhe parashikohet të zgjasë deri në orën 3 të pasdites. Të gjithë ekipet e emergjencave janë në terren për të ndihmuar njerëzit e prekur, ndonëse ndërhyrja e tyre në disa zona është e vështirë, për shkak të pemëve të rrëzuara, trashësisë së dëborës dhe automjeteve të bllokuara nëpër rrugë. Mbi 40 mijë banesa janë pa energji elektrike, ndërsa rreth 150 mijë qytetarëve iu rikthye energjia pas punës në terren të stafeve të emergjencave. Trashësia e dëborës arrin deri në 30 centimetra, shpejtësia e erës regjistrohet deri në 160 kilometra në orë, ndërsa temperaturat kanë zbritur në minus 13 gradë celsius.