Katër persona kanë humbur jetën në Rumani nga përmbytjet e shkaktuara nga stuhia Boris, e cila ka sjellë shira të rrëmbyeshëm në Evropën Qendrore dhe Lindore. Që nga e enjtja, pjesë të Austrisë, Republikës Çeke, Hungarisë, Rumanisë dhe Sllovakisë janë goditur nga erëra të forta dhe shira jashtëzakonisht të ashpra. “Ne po përballemi sërish me efektet e ndryshimeve klimatike, të cilat janë gjithnjë e më të pranishme në kontinentin europian, me pasoja dramatike. Duhet të vazhdojmë të forcojmë kapacitetin tonë për të parashikuar ngjarje ekstreme të motit”, tha presidenti rumun. Në Rumani janë shënuar edhe dëme të shumta, përfshirë shkatërrimin e 5000 shtëpive. Qindra njerëz janë shpëtuar në 19 pjesë të vendit, thanë shërbimet e rasteve emergjente, duke publikuar një video të shtëpive të përmbytura në një fshat buzë lumit Danub. Banorët vendas e kanë konsideruar këtë situatë të krijuar një katastrofë me përmasa të mëdha. Rreth 100,000 zjarrfikës janë mobilizuar në Republikën Çeke, ku të premten janë regjistruar afro 2,900 incidente, shumica prej tyre për shkak të pemëve të rrëzuara dhe përmbytjeve. Pothuajse 50,000 shtëpi janë pa energji elektrike këtë të shtunë, tha kompania çeke e energjisë CEZ dhe një spital në qytetin juglindor u evakuua të shtunën në mëngjes. Sllovakia ka shpallur gjendjen e jashtëzakonshme në kryeqytetin Bratislavë. Ndërkohë në Poloni, qeveria paralajmëroi se situata do të ishte më e vështira në jugperëndim. Austria regjistroi erëra prej 146 kilometrash (91 milje) në orë. Zjarrfikësit kanë ndërhyrë rreth 150 herë në kryeqytet që nga e premtja për të pastruar rrugët e bllokuara nga mbeturinat e stuhisë dhe për të nxjerrë ujin nga bodrumet. Katër mijë shtëpi në rajonin janë pa energji, teksa autoritetet paralajmërojnë se kulmi i stuhisë nuk ka ardhur ende.