Ka ndoshta shumë arsye bindëse për të marrë vaksinën e gripit këtë vjeshtë, por është edhe një që mund t`ju befasojë: sipas një studimi të fundit, kjo lloj vaksine mund të mbrojë trurin. Hulumtimi tregon se vaksinimet e rregullta kundër gripit dhe sëmundjeve të tjera infektive si herpes, tetanozi apo difteria mund të zvogëlojnë rrezikun e zhvillimit të Alzheimerit dhe demencës së lidhur me të. Vaksinat janë historia e suksesit të madh të shëndetit public të gjeneratës sonë, tha profesori Paul E.Schulz nga Hjustoni. “Ato ju mbajnë të sigurtë nga çdo numër infeksionesh, shumë prej të cilave mund të jenë kërcënuese për jetën. Dhe tani duket se ka një përfitim tjetër të jashtëzakonshëm, kundër një sëmundjeje e cila është një ndër më të frikshmet që kemi parë”, shprehet ai. Një sërë kërkimesh kanë treguar se njerëzit që marrin vaksina për gripin dhe sëmundje të tjera infektive duket se kanë më pak të ngjarë se të pavaksinuarit të zhvillojnë demencë, megjithëse shkencëtarët nuk janë të sigurtë se përse ndodh një gjë e tillë. Disa prej tyre besojnë se agjentët infektivë luajnë një rol në zhvillimin e sëmundjes Alzheimer dhe se vaksinat ndihmojnë duke parandaluar ose reduktuar gjasat e marrjes së këtyre infeksioneve. Schulz po kështu spekulon se vaksinat mund të frenojnë një reagim të sistemit imunitar ndaj pllakës amiloide, një proteinë natyrale që gjendet në nivele tejet të larta tek të sëmurët me Alzheimer. Sistemi imunitar e sheh atë si një element të huaj dhe e sulmon, duke shkaktuar inflamacion kronik të trurit dhe vdekje të neuromeve, cka kontribuon në demencë.