Gjykata e të drejtave të njeriut në Strasburg ka konstatuar se shteti shqiptar ka abuzuar kundrejt një shtetaseje duke e vendosur në paraburgim jashtë kritereve ligjore. Në çështjen “Hysa kundër Shqipërisë”, gjykata evropiane vëren se kundrejt shtetases shqiptare, e akuzuar për skemë mashtrimi me rimbursimin e TVSH-së kur ishte zyrtare në Drejtorinë e Tatimeve, nuk kishte arsye të mjaftueshme dhe të duhura për të marrë masën e paraburgimit duke shkelur parimet e konventës europiane për të drejtat e njeriut në nenin 5 pika 3, që lidhet me lirinë dhe sigurinë. Shtetasja Afrodita Hysa paditi shtetin shqiptar me argumentin se dhënia e paraburgimit ishte e paarsyetuar pasi ajo ishte vetë-dorëzuar në polici dhe rreziku i arratisjes nuk ekzistonte, pasi ishte martuar me një oficer policie dhe nënë e dy fëmijëve të vegjël. Fillimisht, shtetasja e apeloi vendimin në Gjykatën e Lartë dhe atë Kushtetuese, të cilat e lanë në fuqi duke iu drejtuar më pas organit më të lartë gjyqësor në Evropë. Sipas Gjykatës së Strasburgut vetëm rëndësia e veprës penale nuk mjafton për të sjellë paraburgimin. Duke fshikulluar drejtësinë shqiptare, GJEDNJ shprehet se “Justifikimi për çfarëdo periudhe burgimi, pavarësisht se sa e shkurtër ka qenë kjo periudhë, duhet të demonstrohet në mënyrë bindëse nga autoritetet”. Gjykata Evropiane vendosi se znj.Hysa duhet të dëmshpërblehet në vlerën 8 mijë euro për dëmin jopasuror të shkaktuar si dhe për kostot dhe shpenzimet gjatë proceseve gjyqësore.