Kryeministri britanik, Keir Starmer, ka mbrojtur kryeministrin Edi Rama, sa i përket çështjes së emigrantëve të paligjshëm që futen në Mbretërinë e Bashkuar. Duke thumbuar në mënyrë të tërthortë Nigel Farage, shkruan “The Sun”, ai tha se disa kishin “hedhur fyerje” ndaj vendeve si Shqipëria, në vend që të bashkëpunonin, duke iu referuar grindjes së udhëheqësit të Reformës me kryeministrin e Shqipërisë Edi Rama. Sir Keir i tha gazetës “The Sun” se trafikantët kanë ndërtuar një perandori kriminale që shtrihet në të gjithë Evropën, të cilën Mbretëria e Bashkuar duhet ta mbyllë. Kryeministri është zotuar të mbyllë atë që e quan “autostrada kriminale”, e cila kalon përmes Ballkanit Perëndimor, për të cilën shton se “po e përmbyt Britaninë me emigrantë”. “Ekziston një autostradë kriminale që kalon nëpër Ballkanin Perëndimor, duke i çuar emigrantët e paligjshëm direkt në Mbretërinë e Bashkuar. Detyra jonë është ta mbyllim dhe të shkatërrojmë bandat që e drejtojnë“, tha ai. Starmer do të presë sot udhëheqës nga rajoni në përpjekje për të shkatërruar bandat e kontrabandës që qëndrojnë pas rritjes së kalimeve të Kanalit. Ministrat shpresojnë që në Samit të arrihet një marrëveshje për qendrat e kthimit të emigrantëve. Britania po vendos dronë në pikat e kontrollit në të gjithë Ballkanin për të ndaluar kontrabandistët të sjellin emigrantë të paligjshëm.