Kryeinfermierja Oksana Padalka thotë se nganjëherë lufta bën të dridhen muret e spitalit dhe atë e kap trishtimi e paniku. Por më pas detyron veten të buzëqeshë duke u rikthyer në punë e duke siguruar pacientët se "gjithçka do të shkojë mirë për Ukrainën.” Lufta është afruar në zonat periferike të Kievit, vetëm disa kilometra larg spitalit psikiatrik Novo-Bilitski dhe rreth 300 rezidentëve të tij. "Sot ndjemë një shpërthim të fuqishëm, po mësohemi me to. Vetëm shpresojmë të mos na bjerë ndonjë raketë," thotë ajo. Padalka shton se nuk ka dëgjuar nga një kolege e saj inifermiere prej dy javësh, prandaj trishtohet dhe shkon diku ku të mos e shohin duke qarë. Edhe kreu i neuropsikiatrisë së burrave thotë se është po aq i ezauruar sa kolegët e tij, teksa çdo ditë predha artilerie kanë rënë në zonat pranë spitalit. "Shpërthimet ishin të forta, nganjëherë të shtënat nuk na lënë të flemë natën”, thotë ai, duke shtuar se dhjetra anëtarë të stafit janë larguar.