Një aksident i rëndë më pasojë plagosjen e 35 personave ndodhi këtë të shtunë në një pistë skish në malet Pirenej të Spanjës. Bllokimi i kavos së teleferikut dhe shkëputja e një kabine nga struktura mbështetëse, në një lartësi prej 15 metrash solli rrëzimin e disa njerëzve e për pasojë plagosjen e tyre, por edhe të personave të tjerë që në ato momente bënin ski në pistë. Drejtori i emergjencave civile për rajonin e Aragonit ku edhe ndodhi incidenti tha se 9 persona janë në gjendje më të rëndë. Pesë helikopterë dhe dhjetëra ambulanca u dërguan në vendpushimin e skive për të transportuar të plagosurit në spitalet më të afërta. Në operacionin e shpëtimit kanë marrë pjesë edhe anëtarë të Kryqi i Kuq, Mbrojtja Civile, por edhe zjarrfikësit. Krahas shpëtimit të të plagosurve, u ofrua ndihma e nevojshme për disa persona të ngecur në kabinat e teleferikut. Kryeministri spanjoll Pedro Sanchez tha se po ndiqte nga afër të gjithë situatën, duke ofruar ndihmën e qeverisë së tij për të gjithë të plagosurit.