“Për herë të parë në shekullin e shtetësisë së Shqipërisë, një njësi e pavarur kundër korrupsionit po arreston politikanë, zyrtarë dhe kontrabandistë droge, me sa duket pa frikë apo favorizim”. Kështu shkruan “The economist” në një shkrim për Shqipërinë, me titullin “SPAK po rrëzon figurat e mëdha”, ku vlerëson punën e Prokurorisë së Posaçme në luftën ndaj korrupsionit në nivele të larta. “The economist” thekson se “gjithnjë e më shumë elita e Shqipërisë, përfshirë zyrtarë të lartë të Partisë Socialiste në pushtet, po kapen në rrjetën e saj dhe se kryeministri Edi Rama nuk është më aq entuziast sa ishte kur ajo arrestonte kryesisht kundërshtarët e tij”. “Në vitin 2023, SPAK e vendosi Sali Berishën, një ish-president që drejton partinë kryesore të opozitës në vend, në arrest shtëpiak. Ai është në gjyq për korrupsion. Vitin e kaluar arrestoi Ilir Metën, një tjetër ish-president dhe tani udhëheqës të opozitës. Edhe ai është akuzuar për korrupsion. Ish-ministra në qeveritë e zotit Rama janë arrestuar gjithashtu, dhe në shkurt ishte radha e Erion Veliajt, kryetarit të bashkisë socialiste të Tiranës, i konsideruar si një pasardhës i mundshëm i zotit Rama. Të tre i mohojnë akuzat”, thuhet në shkrim. Më tej, “The economist” përmend dhe akuzat mes palëve, ku shkruan se “z. Berisha pretendon se zoti Rama po e persekuton atë, dhe e quan SPAK "kamzhikun e tij". Por numri në rritje i bashkëpunëtorëve të ngushtë të zotit Rama të akuzuar për korrupsion ka dëmtuar edhe imazhin e tij. Kur u arrestua zoti Veliaj, ishte radha e kryeministrit për të akuzuar SPAK-un për shkelje të të drejtave të njeriut. Kjo i solli atij qortime nga Bashkimi Evropian; një diplomat nga një vend i BE-së i quan akuzat e tij "mashtrime". Zoti Rama shpejt hoqi dorë nga sulmet e tij”, shkruan media britanike.