Protestat kundër goditjes ndaj emigrantëve nisën fillimisht në Los Angeles një javë më parë dhe kryesisht mbetën të përqendruara në disa blloqe të qytetit të madh. Dëmet përfshinin vandalizëm, plaçkitje, përplasje me forcat e rendit dhe disa taksi autonome të djegura. Trump, i cili vazhdimisht ka ekzagjeruar përmasat e trazirave, dislokoi 4,000 trupa të Gardës Kombëtare dhe 700 marinsa amerikane në Los Angeles, pavarësisht kundërshtimeve të zyrtarëve lokalë, duke pretenduar se ata kishin humbur kontrollin mbi qytetin "në flakë". Ishte hera e parë që nga viti 1965 që një president amerikan dërgonte Gardën Kombëtare kundër dëshirës së një guvernatori shteti. Kritikët e akuzuan Trump-in për kapje pushteti, ndërsa protestuesit në Los Angeles të enjten shfaqën zemërimin e tyre për goditjen ndaj emigrantëve. Zemërimi ndaj bastisjeve të Trump-it dhe përdorimit të agjentëve të armatosur dhe të maskuar të emigracionit, të mbështetur nga ushtarë me uniformë, ka nxitur protesta edhe në qytete të tjera si San Francisko, Çikago dhe San Antonio, Texas. Në Xhorxhia, një shtetas meksikan vdiq në një qendër të ICE-it, njoftoi të enjten ministria e jashtme e Meksikës, duke shtuar se po përpiqej të "sqarojë faktet dhe të konfirmojë shkakun zyrtar të vdekjes." Protestat kombëtare me moton “Pa Mbret” qw mbahet kwtw tw shtunw nw shtetet e bashkuara do të përkojnë me një paradë ushtarake shumë të pazakontë ku Trump do të marrë pjesë në kryeqytetin amerikan. Parada, që përfshin avionë luftarakë dhe tanke, është organizuar për të festuar 250-vjetorin e themelimit të Ushtrisë Amerikane, por rastis edhe me ditëlindjen e 79-të të Trump-it.