Kuvendi do të mblidhet sot në orën 17:00. Në seancë është parashikuar që të zhvillohen diskutime për çështjet e evidentuara nga zgjedhësit. Por pavarësisht kësaj, pritet që dhe seanca e sotme parlamentare të shoqërohet me tensione mes deputetëve të opozitës dhe mazhorancës. Sali Berisha, I cili tashmë po përballet me drejtësinë, njoftoi të shtunën në mbledhjen e këshillit kombëtar të rithemelimit protesta kundër qeverisë në parlament, rrugë por dhe sheshe. Në seancën parlamentare të 19 tetorit, salla u shndërrua në një arenë proteste për ligjvënësit mbështetës të Berishës, të cilët uzurpuan karriget e ministrave dhe foltoren. Në pamundësi për të vijuar me diskutimet, nënkryetarja e Kuvendit, Ermonela Felaj njoftoi shtyrjen e seancës. Ndërkohë mazhoranca zyrtarisht depozitoi kërkesën për përjashtimin nga Kuvendi të 26 deputetëve opozitarë. Vendim që u mor po atë ditë, dhe që pritet të bëhet temë debati edhe ditën e sotme. Të gjithë deputetët e përjashtuar kanë njoftuar se do të mbërrijnë në Kuvend për t’u bërë pjesë e seancës, me argumentin se afati 10 ditor i përjashtimit ka përfunduar më datë 29 tetor. Por nga ana tjetër mazhoranca socialiste mendon të kundërtën. Kjo referuar nenit 121/1 dhe konkretisht fjalisë së dytë të pikës 3 ku thuhet se: “Kur dita e fundit e një afati bie e shtunë, e diel ose një ditë feste zyrtare, afati mbaron në ditën e punës që vjen pas saj”. Në këto kushte të leximit krejtësisht të kundërt të Rregullores së Kuvendit, duken të pashmangshme tensionet në Kuvend.