Besimtarët myslimanë në Shqipëri dhe në mbarë botën festojnë sot Fitër Bajramin, pas një muaji agjërimi dhe sakrifice. Kjo ditë ka një domethënie të veçantë, pasi lidhet me ndihmën ndaj atyre që kanë më pak, përmes shpërndarjes së lëmoshës dhe solidaritetit, në mënyrë që të gjithë ta gëzojnë festën së bashku. Në mesazhin e tij, kreu i Komunitetit Mysliman, Bujar Spahiu, u bëri thirrje besimtarëve që të mos harrojnë më të varfrit dhe ata në nevojë në këtë ditë feste.