Emisioni Top Story, në Top Channel, publikoi ekskluzivisht, mbrëmjen e kësaj të marte, sondazhin e dytë të realizuar në bashkëpunim me kompaninë e njohur amerikane “McLaughlin and Asociated”. Sipas të dhënave të sondazhit të dytë, të realizuar në 15 ditët e fundit të muajit prill, nëse zgjedhjet parlamentare do të mbaheshin sot, Partia Socialiste do të fitonte me 48.9% të votave në rang vendi, e ndjekur nga Partia Demokratike, me 34.4% të votave. Partia “Mundësia” e Agron Shehajt del forcë e tretë, me 5% të votave, e ndjekur nga Nisma Shqipëria Bëhet e Adriatik Lapajt me 4.2% të votave dhe Partia Socialdemokrate e Tom Doshit me 2.9% të votave. Sondazhi ndalet veçanërisht në dy qarqet e rëndësishme dhe ndër kryesorët në vend, Durrësi dhe Shkodra. Sipas të dhënave, nëse zgjedhjet do të ishin sot, Qarku i Durrësit do të votonte 50% për Partinë Socialiste të Edi Ramës dhe 36% për Partinë Demokratike të Sali Berishës. Ndërkohë, në Qarkun e Shkodrës, Partia Demokratike do të merrte 43.1% të votave, kundrejt 36.1% që do të shkonin për Partinë Socialiste dhe 11.1% për Partinë Socialdemokrate. Të dhënat e sondazhit u publikuan nga sondazhisti John McLaughlin, një nga emrat më të njohur të sondazheve dhe strategjisë elektorale në Shtetet e Bashkuara të Amerikës, i cili tha se gara në Shqipëri bëhet mes dy partive kryesore. Sink mclaughlin “Kandidatët kryesorë ndodhen pak a shumë në të njëjtin pozicion. Gara kryesore është e fokusuar mes kryeministrit Rama dhe Sali Berishës, pra mes socialistëve dhe demokratëve”, tha McLaughlin. Sipas të dhënave të sondazhit të dytë, Edi Rama është lideri më i pëlqyer për shqiptarët, me 51.8% të votave, i ndjekur nga Sali Berisha me 37.5% të votave, Agron Shehaj me 37.3% dhe Adriatik Lapaj me 35.6%. Ndërkohë, Arlind Qori pëleqehet nga 27.7% e shqiptarëve, i ndjekur në një përqindje më të vogël, përkatësisht 13.6% nga Lulzim Basha i Demokratëve Euroatlantikë. Referuar të dhënave të sondazhit, realizuar dy javët e fundit të prillit, 51.5% e shqiptarëve e vlerësojnë drejtimin e Shqipërisë të mirë; ndërsa 49.2% e shqiptarëve preferojnë për kryeministër Edi Ramën, kundrejt 33.6% që duan Sali Berishën. Sipas të dhënave, tre mbeten problemet kryesore që shqetësojnë qytetarët shqiptarë, ekonomia, papunësia dhe emigracioni. Sondazhi i McLaughlin, në bashkëpunim me Top Channel, është i pari në Shqipëri, i një kalibri me ekspert ndërkombëtar, përfshihet në mbulimin zgjedhor, që sjell një standard të ri në analizën e opinionit publik dhe parashikimin e tendencave elektorale. John McLaughlin është vlerësuar nga presidenti Donald Trump si “një nga më të mirët në këtë fushë” dhe “një mendje brilante strategjike”.