Një snajper policie i shpëtoi jetën Donald Trump duke qëlluar fillimisht pushkën e atentatorit të 13 korrikut dhe duke i hequr atij mundësinë që të kryente gjuajtje të tjera. Sipas një raporti nga kongresmeni i Luizianës, Klei Higins, plumbi i snajperit dëmtoi armën e Tomas Methju Kroks dhe ndërpreu synimin e tij pas të shtënave të para në Batler, Pensilvani. Pak çaste më vonë, një snajper i Shërbimit Sekret e vrau atë. Raporti vjen pasi Shërbimi Sekret caktoi përkohësisht disa truproja shtesë me urdhër të Presidenti Joe Biden në adresë të Donald Trump. Trump do t'i sigurohet gjithashtu mbrojtje xhami antiplumb për ta lejuar atë të rifillojë mitingjet në natyrë. Ish-presidenti nuk kishte mbrojtje gjatë mitingut të tij të 13 korrikut në Batler, kur një plumb për pak e goditi atë në kokë. Raporti i Higins tha se një agjent i “Batler SUAT” ishte i pari që qëlloi në drejtim të vrasësit të Trump - nga 100 metra larg. Kongresmeni tha se me një të shtënë të vetme, ai qëlloi drejt personit të armatosur dhe goditi një pjesë të pushkës së tij. Nivelet e sigurisë rreth ish-presidentit janë rritur që atëherë. Kimberli Çetëll, drejtoresha e Shërbimit Sekret, dha dorëheqjen më 23 korrik pas një seance dëgjimore në Dhomën e Përfaqësuesve të SHBA për atentatin. FBI po heton aktualisht dështimin e mbrojtjes dhe liderët politikë në Kongresin e SHBA kanë nisur gjithashtu hetimet.