Bisedat e zbërthyera nga aplikacioni i koduar Sky ECC kanë zbuluar detaje të reja nga aktiviteti i një grupi të strukturuar kriminal shqiptar që dyshohet se merrej me trafikun ndërkombëtar të kokainës dhe pastrimin e parave. Sipas hetimeve të Prokurorisë së Posaçme, grupi dyshohet se drejtohej nga Luçiano Koçeku dhe Alfredo Hamzai të cilët kishte krijuar një rrjet të shtrirë në Amerikën Latine dhe Europë, ndërsa anëtarët e tij vijonin aktivitetin kriminal nga vende si Kolumbia, Ekuadori dhe Brazili. Në komunikimet e zbardhura në Sky ECC, hetuesit kanë gjetur edhe biseda ku anëtarët e grupit flisnin për jetën e tyre private dhe marrëdhëniet që kishin krijuar me vajza në Amerikën Latine. Në një tjetër komunikim, ata flasin për takime dhe kontakte me vajza latine, ndërsa përmenden edhe çështje që lidhen me aktivitetin e tyre. Sipas hetimeve, grupi dyshohet se trafikonte kokainë nga Kolumbia, Ekuadori, Bolivia, Porto Riko dhe Brazili drejt Europës, ndërsa përdorte mënyra të ndryshme për fshehjen e lëndës narkotike.