Top Channel zbardh detaje nga skema e abuzimit në departamentin e Onkologjisë në QSUT, ku të përfshirë ishin mjekë dhe specialistë. Veprimet hetimore nën drejtimin e prokurorit Bledar Valikaj, janë ndjekur si me veprime proaktive duke përfshirë përgjimet telefonike, vëzhgimet në terren, blerjet e simuluara, ashtu edhe me veprime të hapura hetimore. Në dosje theksohet se punonjës të këtij departamenti ku rolin kryesor e ka kryeinfermieri i pavionit pasi merrnin programin e plotë për kurën e një pacienti me një medikament që sigurohet nga shteti duke qenë se çdo pacient i kimios është i regjistruar në databazë nuk e linin të gjithë kurën e plotë për trajtim por një pjesë të saj e nxirrnin për t’u blerë jashtë spitalit dhe konkretisht në dy farmaci private. Një medikament për kimion është shumë i kushtueshëm dhe flakoni varion nga 250 Euro deri në 1500 euro. Përveç rastit kur medikamenti për kimio nxirret dhe tregtohet jashtë ambienteve spitalore që është shkelje, ka dhe raste të tjera kur brenda farmacisë spitalore të njohur nga stafi personel, mund të shkojë kushdo që është i afërm i një pacienti me kimio ose punonjës i brendshëm dhe kundrejt një shume monetare mund të tërheqë medikament dhe pse nuk është radha e tij për kurim por në listën e pritjes është një person tjetër.