Disa ditë pasi “Fiks Fare” denoncoi një masakër mjedisore në zonën turistike të Ksamilit, është arrestuar inspektori i zonës së Butrintit Çane Aliaj dhe specialisti i Ksamilit pranë ARZM Vlorë, Sokol Xhyheri. Ndërkohë, për veprën penale shpërdorim i detyrës u vunë nën hetim në gjendje të lirë drejtori i ARZM Vlorë Nexhip Hysolakoj, inspektori i Inspektoriatit Shtetëror të Mjedisit, Pyjeve, Ujërave dhe Turizmit, Nertil Cumani dhe inspektori i IVMT-së, Besian Koçi. Duke shpërdoruar detyrën, ata kanë lejuar aktivitetet e paligjshme në zonën e Pemës së Thatë dhe në Butrint, në dëm të mjedisit. Kamera e Fiks Fare filmoi inertet e hedhura në vendin e quajtur Pallavraq. Dikur, zona kishte qenë liqenore, ndërsa më pas e mbuluar me tonelata me inerte. Nga një krahasim i hartave të vitit 2010 me atë aktuale, rezultoi se vendi ku ishin hedhur këto inerte, disa muaj më parë ka qenë zonë ujore, bregu i Liqenit të Butrintit. Ndërsa sot, gurë të mëdhenj, mbetje të liqenit, dhera janë hedhur atje. Ndërkohë nga zyrtarët e arrestuar po fillonte tentative për ta rrethuar zonën dhe për ta shndërruar më pas në ndonjë bar, restorant, hotel apo resort. Kamerat e Fiksit ndoqën rastin në të gjitha shkallët e institucioneve, ndërsa hetimet e policisë nxorën në pah autorët.