Intervista e parë që presidenti amerikan Joe Biden dha pas debatit televiziv me rivalin e mundshëm Donald Trump në garën për një mandat të dytë presidencial, ishte e parapërgatitur nga vetë stafi i tij. Andrea Lawful-Sanders, drejtuesja e emisionit “The Source” në stacionin lokal të radios WURD i drejtoi Biden katër pyetje që ia kishte dhënë ekipi elektoral i presidentit. Gazetarja tregoi se ekipi elektoral i presidentit i kishte dërguar tetë pyetje, katër prej të cilave i përdori gjatë intervistës. WURD, i vetmi kanal radiofonik në Pensilvani që është në pronësi afrikano-amerikane, tha se për intervistën ishte negociuar pa dijeninë e drejtuesve të kanalit dhe pa u konsultuar me ta. Ndërsa presidentja e kanalit Sara Lomax, përmes një deklarate dënoi rastin duke thënë se dërgimi i pyetjeve nga ekipi elektoral “shkel praktikën tonë të ruajtjes së pavarësisë mediatike” dhe njoftoi se gazetarja do të largohet nga puna. “WURD ka punuar për të fituar besimin e audiencës gjatë historisë sonë 20-vjeçare. Pyetjet e paracaktuara nuk janë praktikë e punës sonë”, u shpreh ajo. Një tjetër drejtues emisionesh në radio, i cili gjithashtu intervistoi presidentin Biden, tha se edhe atij i ishin dhënë pyetje përpara intervistës dhe se për këtë arsye nuk mundi të bënte pyetjet që kishte dëshirë. Paraqitja e Biden në debatin me Trump është kritikuar nga qytetarët, analistët, madje dhe nga disa demokratë. Por, pavarësisht shqetësimeve në rritje për aftësinë e tij mendore dhe qëndrueshmërinë në fushatën elektorale, Biden iu drejtua të hënën demokratëve të Kongresit në një letër të hënën, ku shprehu gatishmërinë për rikandidim. Pamjet; AFP