Skandali “Epstein” ka prekur edhe Sllovakinë. Publikimi i miliona faqeve nga dosjet e pedofilit amerikan nxori edhe bisedat e Epstein me këshilltarin e kryeministrit sllovak, Robert Fico, Miroslav Lajçak. Pak orë pas publikimit të materialeve nga Departamenti amerikan i Drejtësisë, Lajçak i paraqiti kryeministrit dorëheqjen e tij si këshilltarë. Sipas kryeministrit, duke dhënë dorëheqjen nga ky post, Lajçak dëshmoi se ishte një diplomat i shkëlqyer. Lajçak fillimisht mohoi të ketë bërë diçka të keqe, duke e përshkruar komunikimin me Epstein si informal, por më pas ofroi dorëheqjen për të shmangur koston politike për kryeministrin, sipas raporteve të mediave sllovake. “Jo sepse kam bërë diçka kriminale apo joetike, por që ai të mos mbajë kosto politike për diçka që nuk ka lidhje me vendimet e tij. Nëse do ta kisha ditur shkallën e plotë të veprimeve të Epstein në të kaluarën, nuk do të kishte pasur komunikim me të”, u shpreh Lajçak, pas dorëheqjes, që iu pranua nga kryeministri Fico. Ky i fundit theksoi se me largimin e Lajçak, Sllovakia po humbet një burim përvoje në diplomaci dhe në politikën e jashtme. Miroslav Lajçak ka shërbyer më parë si ministër i Jashtëm i Sllovakisë, por edhe si i dërguari i Bashkimit Evropian për dialogun Kosovë-Serbi.