Autoritetet në Itali kanë arrestuar një burrë 56-vjeçar, i cili u shfaq i veshur si nëna e tij për të vazhduar të merrte pensionin e saj. Mashtrimi i 56-vjeçarit të papunë zbuloi se nëna e tij kishte vdekur prej tre vitesh dhe se ai e mbante trupin e saj në shtëpinë ku jetonin. Nëna kishte dhënë shpirt tre vjet më parë, në moshën 82-vjeçare, siç shkruan Corriere della Sera, ndërkohë 56-vjeçari nuk e kishte deklaruar zyrtarisht vdekjen e saj dhe nga ana ai e kishte fshehur trupin e saj duke e mbështjellë me një çarçaf në shtëpinë e tij. Mashtrimi u zbulua kur 56-vjeçari u paraqit në një zyrë qeveritare për të rinovuar identitetin e nënës së tij. Përveç rrobave të nënës së tij, 56-vjeçari kishte vënë edhe buzëkuq dhe një gjerdan me perla, si dhe kishte prerë flokët për t’i ngjarë nënës së tij të vdekur. Megjithatë, një punonjës dyshoi për mashtrim kur pa qafën e trashë dhe zërin e “gruas” që bëri kërkesën. Ajo fillimisht njoftoi policinë dhe më pas kryetarin e bashkisë, me autoritetet që krahasuan fotot zyrtare të nënës me ato të djalit të saj, duke zbuluar mashtrimin. Sipas raportimeve, 56-vjeçari kishte arritur të siguronte një të ardhur vjetore prej rreth 53,000 eurosh nga pensioni i nënës së tij, si dhe një portofol pasurish të paluajtshme që përfshinte tre shtëpi. Pasi 56-vjeçari u arrestua, policia shkoi në shtëpinë e tij, ku zbuloi trupin e gruas 82-vjeçare në lavanderi. “Ai erdhi në bashki i veshur me një fund të gjatë, buzëkuq dhe manikyr, një gjerdan dhe vathë të modës së vjetër. Por nga afër, qafa e saj ishte shumë e trashë dhe rrudhat ishin të çuditshme, lëkura në duar nuk dukej si ajo e një gruaje 85-vjeçare. Zëri i saj ishte femëror, por herë pas here ulej dhe tingëllonte mashkullor”, tha kryetari i bashkisë së Borgo Virgilio, Francesco Aporti.