Xhovana Nikolli ka reaguar në rrjete sociale, pasi iu vu tritol në derën e banesës. E reja e cila është tepër aktive në rrjetet sociale, akuzon të penduarin e drejtësisë, Nuredin Dumani, i arrestuar dy vite më parë në Fier se është ai që i ka vendosur tritol. Xhovana në postimin e fundit shprehet se nuk është një femër që dorëzohet lehtë dhe se me këtë veprim Nuredini ka marrë në qafë njerëz të gabuar, duke mos kursyer dhe ofendimet. Apartamenti është marrë me qira para dy vitesh nga Alda Nikolli, motra e Xhovana Nikollit. Në këtë banesë, para dy javësh është bashkuar dhe e motra e saj Xhovana Nikolli. Një ditë para shpërthimit ajo ka postuar një video ku përmendte Nuredin Dumanin dhe të dashurën e tij. Kjo është një ndër pistat që po heton policia e Elbasanit. Ndërkohë që dy motrat kanë mbajtur qëndrim mohues dhe kanë thënë se nuk kanë konflikte me askënd. Pistë tjetër ku po heton policia janë konfliktet që mund të ketë pronari i banesës, Besnik Braka i cili rezulton me precedent penal. Më parë atij i është vrarë dhe një vëlla. Mban dhe emrin Nik Vojaçek. Nga shpërthimi i tritolit u lëndua fqinji i dy vajzave, i cili ishte zgjuar nga zhurmat kur ndodhi ngjarja dhe e zuri dera e banesës poshtë. I riu ndodhet në intubim në Spitalin e Traumës. Xhovana Nikolli njihet për lidhjen e saj me Amarildo Nikollin i cili u arrestua nga policia rreth një vit më parë, si i dyshuar që ishte porositur për të vrarë dy persona në qytetin e Vlorës. ‘Shkodrani’, siç edhe thirret nga shoqëria, po qarkullonte me armë zjarri me silenciator dhe me fishek në fole, gati për qitje dhe dyshohej se kishte ardhur nga Italia në Shqipëri për të kryer një vrasje me pagesë.