Mbi 22 mijë njerëz u detyruan të largohen nga banesat e tyre në British Columbia të Kanadasë, ndërsa rreth 10 mijë të tjerë janë paralajmëruar të jenë të gatshëm për evakuim, për shkak të zjarreve të fuqishme që po përhapen me shpejtësi. Situata ka detyruar autoritetet provinciale të shpallin gjendjen e jashtëzakonshme, pasi më shumë se 100 vatra zjarri janë aktive dhe rreth gjysma e tyre vijojnë të jenë jashtë kontrollit. Temperaturat e larta, erërat e forta dhe thatësira e zgjatur kanë krijuar kushte të favorshme për përhapjen e flakëve. Autoritetet e zonës thanë se situata është jashtëzakonisht serioze, ndërsa ekipet e emergjencave po punojnë për evakuimin dhe shpëtimin e banorëve. Një nga zonat më të prekura është komuniteti i Summerland, me rreth 12 mijë banorë, i cili u evakuua i tëri. Po ashtu, edhe zona e Peachland me rreth 8 mijë banorë u evakuua, ndërsa mijëra të tjerë kanë marrë urdhër për evakuim në çdo moment. Autoritetet ende nuk kanë një bilanc të saktë për numrin e banesave të shkatërruara.