SHBA thotë ka hequr shpërblimin prej 10 milionë dollarësh për arrestimin e liderit të ri sirian. Barbara Leaf, zyrtare e lartë amerikane për Lindjen e Mesme, njoftoi zyrtarisht të premten se e ka informuar liderin e ri të Sirisë, Ahmed al-Shaara se Uashingtoni e ka anuluar shpërblimin për arrestimin e tij, dhe i ka mirëpritur “mesazhet pozitive” në diskutime, përfshirë premtimin për luftim të terrorizmit. Ajo deklaroi se ka biseduar me Shaaran për “nevojën kritike që grupet terroriste të mos përbëjnë kërcënim brenda Sirisë, apo jashtë shtetit, përfshirë Shtetet e Bashkuara dhe partnerët në rajon”. FBI-ja në Shtetet e Bashkuara vendosi shpërblim prej 10 milionë dollarësh në vitin 2017 për ata që kanë informacione që çojnë në arrestim të Sharaas, të njohur më parë si Abu Mohammed al-Jolani, duke përmendur lidhjet e tij të së kaluarës me grupin terrorist, Al-Kaida. Grupi i rebelëve HTS është konsideruar ndër më efektivët në luftën kundër regjimit të Assadit. Regjimi brutal i Assadit u rrëzua pasi gati 14 vjetësh luftë civile, si pasojë e së cilës janë vrarë mbi 500.000 njerëz dhe janë zhvendosur miliona tjerë. Assadi dhe familja e tij janë në Rusi, pas azilit që u është miratuar direkt prej presidentit rus, Vladimir Putin.