Rezidentë në Kiev vraponin sot për të hyrë në strehime të mbrojtura, teksa sirenat e alarmit ajror dëgjoheshin në qytet. Zhvillimi vjen teksa trupat ruse urdhëruan avancimin nga të gjitha drejtimet në Ukrainë, shkruan rrjeti AFP. Moska raportohet se ka goditur me raketa objektivat strategjike dhe ka nisur zgjerimin e sulmit ushtarak pasi Kievi ka refuzuar oferten e bisedimeve. Por në ditën e tretë të pushtimit rus, presidenti Volodimir Zelensky është zotuar se vendi i tij nuk i dorëzohet Kremlinit. Zelensky foli në një video mesazh me veshje ushtarake, për të shprehur vendosmërinë e tij. "Unë jam këtu, nuk do të hedhim armët, do të mbrojmë vendin tonë”, tha ai, duke shtuar më vonë se ishte neutralizuar një plan i Rusisë për ta larguar nga posti. Rusia ka nisur një sulm ndaj Ukraines për të cilin OKB thotë se ka zhvendosur deri tani 116,000 njerëz drejt vendeve fqinje. Dhjetra mijëra të tjerë besohet se janë zhvendosur brenda Ukrainës drejt zonave perëndimore më pak të prekura nga luftimet.