“Gjysma e dytë e kësaj dekade do të jetë me rrezikshmëri të lartë, ndaj Europa duhet të ridimensionojë themelet e sigurisë përmes bashkimit”. Me këto fjalë, Presidentja e Komisionit Evropian Ursula von der Leyen çeli punimet e konferencës vjetore të sigurisë Globsec, që po zhvillohet në kryeqytetin çek Pragë, ku është i pranishëm edhe kryeministri Edi Rama. Presidentja von der Leyen bëri thirrje për një angazhim më të madh evropian për sigurinë duke përmendur pushtimin rus të Ukrainës si provë që blloku duhet të hedhë tutje "iluzionet" dhe të mendojë për bashkimin si thelbin e një projekti për sigurinë. Ursula von der Leyen, Presidente e Komisionit Evropian “Nëse duam paqe të vërtetë, duhet të rimendojmë rrënjësisht themelet e arkitekturës së sigurisë së Evropë. Pushtimi rus në Ukrainë ka shërbyer për t’i hapur sytë Evropës." Duke ju referuar luftës në Ukrainë, presidentja e Komisionit Evropian theksoi qëndrimin e saj se paqja nuk është thjesht mungesa e luftës, ndërsa theksoi se cdo argument për mosmbështetjen e ukrainës nuk është argument për paqe. “Ne duam që lufta të ndalet sa më shpejt të jetë e mundur. Paqja është një zgjidhje që e bën luftën të pamundur dhe të panevojshme. Prandaj, ne duhet ta vendosim Ukrainën në kushtet e negocimit të një paqeje të tillë. Evropianët kanë shumë histori të ndryshme dhe flasin në shumë gjuhë. Por në asnjë gjuhë paqja nuk është sinonim i dorëzimit; Në asnjë gjuhë sovraniteti nuk është sinonim i pushtimit”. Von der Leyen vlerësoi faktin se shpenzimet kolektive të mbrojtjes së vendeve anëtare të Bashkimit europian janë rritur nga 200 miliardë euro që ishin përpara luftës në pothuajse 300 miliardë euro këtë vit. Gjatë punimeve të forumit Globsec në Pragë,presidentja e rizgjedhur e Komisionit Europian zhvilloi një takim me kryeministrin Edi Rama dhe ministrat që e shoqërojnë. Sic bën të ditur kreu i qeverisë në rrjetet sociale, takimi kishte në thelb piketat e rrugës sonë të përbashkët europiane. Në takimet me liderët europianë në Pragë kryeministri Edi Rama pritet të diskutojë e lobojë për integrimin e Shqipërisë në Bashkimin Europian, teksa vendi ynë është në pritje të konferencës së dytë ndërqeveritare.