Vëllezërit Franc dhe Hajdar Çopja tentuan të ekzekutonin disa persona, mes tyre dy ‘kokat’ e krimit Nuredin Dumanin e Erion Alibejn si dhe Aldo Bahon i njohur me nofkën "Sakati”. Veprimtaria kriminale e dy vëllezërve , sipas SPAK daton rreth viteve 2006 – 2007, ku fillimisht e kanë ushtruar aktivitetin kriminal në Itali duke shpërndarë në sasi të vogla lëndë narkotike të llojit kokainë. Me kalimin e viteve ata u fuqizuan shumë nga shitja dhe trafikimi i drogës, ku nga Italia e zgjeruan aktivitetin e tyre kriminal edhe në vende të tjera të Evropës dhe më gjerë. Gjithashtu, me kalimin e viteve u rrit potenciali i tyre ekonomik dhe si rrjedhojë pozita e tyre në raport me grupet e tjera ndryshoi pasi ata krijuan kontakte të cilat ju dhanë më pas mundësi për të krijuar lidhje të drejtpërdrejta me eksponentë të rëndësishëm të trafikut të narkotikëve. Për të zotëruar tregun dhe për të krijuar hegjemoninë e tyre ndaj grupeve të tjera, kjo organizatë kriminale në vitin 2018 filloi eliminimin e kundërshtarëve (nëpërmjet vrasjeve me pagesë), të cilët kishin një rol të rëndësishëm në trafikun e drogës në Evropë dhe më gjerë. Grupi kriminal nën drejtimin e dy vëllezërve tentoi katër herë të vriste Erion Alibejn dhe dy herë të penduarin e drejtësisë Nuredin Dumanin. Ata gjithashtu tentuan të ekzekutonin Aldo Bahon i njohur me nofkën “Sakati” gjatë periudhës maj – gusht të vitit 2020. Gruipi kriminal organizoi vrasjen edhe të 6 personave të tjerë, skema të cilat nuk u arritën të realizoheshin.