Gazeta britanike Daily Mail ka publikuar së fundmi një video që tregon momentin kur dy nga anëtarët e bandës shqiptare prej disa personash kryejnë vjedhje masive në shtëpi luksoze dhe dyqane në Mbretërinë e Bashkuar. Pamjet e kamerave të sigurisë nga një prej grabitjeve tregojnë dy persona të maskuar që hyjnë në kopshtin e pasmë të një banese në Cheshire, duke mbajtur me vështirësi një kasafortë që kishin vjedhur. Disa muaj më herët pesë shqiptarët dhe një grua britanike kanë pranuar rolin e tyre në një seri vjedhjesh me vlerë të lartë në të gjithë Mbretërinë e Bashkuar, të cilët sot raportohet se janë dënuar me 38 vite për vjedhje të cilët arritën në një vlerë afro 3 milionë stërlina. Endrit Nikolli, 27 vjeç, Kristian Gropcaj, 30 vjeç, Gjergj Lleshaj, 31 vjeç, Kristian Dedndreaj, 28 vjeç, dhe Sidorjan Lleshi, 26 vjeç, të gjithë u deklaruan fajtorë për vjedhje, gjatë seancave dëgjimore në Gjykatën e Kurorës në Chester më 28 nëntor 2025 dhe 6 janar. Jade Tubb, 33 vjeçe, gjithashtu u deklarua fajtore për konspiracion për të poseduar pasuri kriminale. Nikolli dhe Lleshi pranuan gjithashtu një akuzë tjetër për vjedhje me dhunë, në lidhje me dy vjedhje në Staffordshire në mars 2024 dhe dhjetor 2023. Grupi kreu të paktën 44 vjedhje në Cheshire, Cleveland, Derbyshire, Leicestershire, Nottinghamshire, Staffordshire, Warwickshire dhe West Mercia. Ata grabitën në Feckenham, Redditch, më 15 janar 2025, tre herë, përfshirë dy herë brenda një dite, në Barnt Green më 1 shkurt dhe 7 shkurt dhe dy herë në Astëood Bank në të njëjtën ditë, më 14 shkurt. Në West Mercia, ata grabitën gjithashtu në Hereford dhe Oswestry, me një total prej nëntë veprash penale. Në çdo rast, ata futeshin në ambiente duke përdorur shkallë për të hyrë nga dritaret dhe ballkonet. Pasi hynin brenda, ata plaçkitnin bizhuteri, çanta firmato dhe para. Hetime të mëtejshme zbuluan se të katër shqiptarët takoheshin rregullisht në një kafene në lagjen e bizhuterive në Birmingham. Përveç kësaj, oficerët vërtetuan se Tubb ishte në një lidhje dashurie me Nikollin. Gjatë bastisjeve, oficerët gjetën 13 çanta dore firmato, së bashku me 14 orë dore me vlerë gati 17,000 paund. Gjatë urdhër-arresteve u sekuestruan gjithashtu disa telefona celularë, dhe gjatë analizës, oficerët gjetën qindra imazhe të sendeve të vjedhura, së bashku me mesazhe që përmbanin linqe për hartat e Google, të cilat korrespondonin me vendin ku ishin kryer vjedhjet. Përveç kësaj, oficerët gjetën mesazhe që tregonin se kishte një anëtar të pestë të bandës, Sidorjan Lleshi, i cili jetonte në Sheffield. “Nikolli, Gropcaj, Dedndreaj, Lleshaj dhe Lleshi ishin të gjithë përgjegjës për kryerjen e vjedhjeve, ndërsa Tubb ishte e lumtur të shpenzonte fitimet e tyre të përfituara në mënyrë të paligjshme. Gjatë kontrolleve, ne gjetëm letra midis Nikollit dhe Tubbit, në të cilat dyshja e përshkruante veten si ‘Bonnie dhe Clyde’, duke iu referuar mënyrës se si po punonin së bashku për të kryer vjedhjet”, thuhet në raportet policisë.