Është vënë në kontroll vatra e fundit e zjarrit të nisur që prej mëngjesit të së dielës në kodrat e fshatit Hekal në Mallakastër. Gjatë ditës flakët e përhapura shkrumbuan disa hektarë me ullishte dhe shkurre, ndërsa një vatër e favorizuar edhe nga era rrezikoi Parkun Arkeologjik të Bylisit. Zjarri u arrit të vihej në kontroll falë ndërhyrjes nga ajri me helikopterin e Forcave të Armatosura. Gjatë gjithë ditës, helikopteri operoi në zonë duke ndihmuar forcat në terren në izolimin e vatrave të zjarrit. Në operacionin e shuarjes u angazhuan gjithashtu forcat zjarrfikëse të Ballshit dhe Fierit, me 8 automjete zjarrfikëse, dy autobote uji dhe mbi 40 forca, mes tyre edhe efektivë të Forcave të Armatosura. Paraprakisht dyshohet se shkak i zjarrit të përhapur në disa vatra është bërë djegia e mbeturinave në tokat përreth, ndërsa policia po punon për identifikimin e personave që përmes pakujdesisë së tyre vunë në rrezik Parkun Arkeologjik të Bylisit.