Mëngjesin e kësaj të hëne mbylli sytë përgjithmonë kolosi i letrave shqipe, shkrimtari më I madh shqiptar dhe një nga shkrimtaret më të rëndësishëm të kohës në botë, Ismail Kadare. Shkrimtari më në zë shqiptar, brenda e jashtë kufijve të Shqipërisë, u nda nga jeta në moshën 88 vjeçare. Ai lindi më 28 janar 1936 në lagjen Palorto të Gjirokastrës. Vokacioni i tij për letërsinë zuri fill në moshë të hershme. Në vitin 1963 botoi romanin e tij “Gjenerali i ushtrisë së vdekur”, i cili pati jehonë edhe përtej vendit. Ishte pikërisht ky roman dhe i dha njohje ndërkombëtare kur u botua në vitin 1963, kur Shqipëria qeverisej nga qeveria komuniste e diktatorit Enver Hoxha. Romani u vlerësua nga gazeta e njohur e Parisit Le Monde si një ndër 100 librat e shekullit XX. Në këtë rrjedhë, autori u frymëzua edhe për shkrimin e romanit “Krushqit janë të ngrirë”, i cili flet mbi demonstratat e vitit 1981 të shqiptarëve të Kosovës. Një tjetër roman i vlerësuar ishte “Kronikë në gur” (1970). Në vargun e publikimeve të pandërprera, romani alegorik “Nëpunësi i Pallatit të ëndrrave” (1981), veçohet si më i lakuari në tërësinë e veprës së Kadaresë. Veprat e Ismail Kadaresë janë përkthyer në mbi 50 gjuhë të botës, duke e bërë kështu një nga shkrimtarët më të adhuruar anembanë globit.