Gjykata Kushtetuese ka shtyrë për në datën 12 dhjetor shqyrtimin e ankimimit të qeverisë për masën e pezullimit nga detyra të zëvendëskryeministres Belinda Balluku, caktuar nga Gjykata e Posaçme Antikorrupsion nën dyshimet për abuzim në procedurat e tenderimit të tunelit të Llogarasë dhe Unazës së Madhe të Tiranës. Kushtetuesja kishte caktuar 4 dhjetorin për shqyrtimin e çështjes, por përmes një njoftimi zyrtar thekson se Mbledhja e Gjyqtarëve është shtyrë më 12 dhjetor, për shkak të kompleksitetit të çështjes dhe volumit të materialeve. "Në vijim të njoftimeve të mëparshme për çështjen me kërkues Kryeministri i Republikës së Shqipërisë, Gjykata informon se shqyrtimi paraprak i çështjes nga Mbledhja e Gjyqtarëve do të bëhet në datën 12.12.2025 për shkak të kompleksitetit të çështjes, volumit të materialeve shoqëruese, agjendës së Gjykatës si dhe mbështetur në kërkesën e disa prej anëtarëve të saj”.