Nëse do të lirohet Erjon Veliaj apo do të vijojë të qëndrojë në burg, kjo do të vendoset të enjten në orën 10:00. Mbasi dëgjoi për të dytën ditë rresht kërkesën e përsëritur për të shfuqizuar masën e ‘arrestit në burg’, dhe nga ana tjetër këmbënguljen e prokurorëve që Veliaj të mos lirohet, gjyqtari i apelit Engert Pëllumbi i la kohë vetes për të parë me detaje provat e reja por edhe parashtrimet e mbrojtjes. Në seancën maratonë me dyer të mbyllura të nisur në apel prej të martës në orën dhjetë e të mbyllur të mërkurën në orën 15:20 Veliaj foli mbas mbrojtjes dhe kësaj radhe nuk kishte tone akuzuese. Sipas të pranishmeve në sallë, kryebashkiaku i Tiranës ka thënë se telefonatat nga burgu i ka kryer me familjen dhe nuk ka asnjë sekret qe të interesohesh për daljet publike mbi dosjen e tij hetimore. Kërkesat e avokatëve ishin të gjitha ato qe parashikon ligji që nga detyrimi ne paraqitje, arrest shtëpie, bllokim pasaporte dhe garanci pasurore. Një nga avokatët e Erjon Veliajt, Artur Selmani, tha për gazetaren e Top Channel Anila Hoxha në mbyllje të seancës “kërkuam revokimin e kësaj mase dhe do në pamundësi për të dhënë këtë masë, një tjetër masë më te lehtë sigurie. Për hollësitë e gjyqit, nuk mund të flas”. Në këtë seancë dy ditore kishin apeluar masat edhe tre biznesmenë që po hetohen në gjendje të lirë. Ndryshim mase kërkoi edhe biznesmeni Elman Abule nën arrest në burg. Edhe biznesmeni insiston se nuk është i rrezikshëm, nuk ndikon provat dhe as largohet baga Shqipëria.