Ish ministri i shëndetësisë Ilir Beqaj u paraqit në ditën e parafundit të komisionit hetimor për sterilizimin dhe chek up, por nuk mundi të dëshmonte. Atij iu desh të presë në ambientet e kryesisë së kuvendit për nëntë orë pasi deputetët e opozitës kërkuan që më parë të arrihej dakordësi për të shtyrë pa afat këtë komision. Mazhoranca nuk pranoi me argumentin se është shtyrë dy herë ky komision dhe të enjten duhet të paraqitet nga ekspertët raporti hetimor përfundimtar. Edhe pas këtyre debateve, kur është futur për të dëshmuar Beqaj ka pritur sërish edhe pasi ka kërkuar që deklaratën e tij ta bëjë nëpërmjet një prezantimi në “power point”. Kryetarja e Komisionit Albana Vokshi nuk e ka lejuar. Debati vazhdoi për orë të tëra, deri sa në fund palët ranë dakord që mbledhja të shtyhet për ditën e mërkurë në orën 10.30. E mërkura është dita e fundit ku janë thirrur si dëshmitarë edhe administratori i koncesionit të “chek up”, i cili nuk është paraqitur pasi ndodhej jashtë shtetit dhe tre aksionerët italianë në koncesionin e sterilizimit.