“Një thesar që nuk duhet lënë të tretet”, e ka cilësuar kryeministri Edi Rama komunitetin e bektashinjve në Shqipëri, teksa ka shpjeguar idenë e tij për transformimin e qendrës së Urdhrit Botëror Bektashi në një shtet sovran brenda Tiranës, gjatë një takim me përfaqësues të shoqatave shqiptare në Amerikë. Për të gjithë kritikët që kanë dalë kundër kësaj ideje, kryeministri tha se do duhet të informohen mbi rolin që ka patur Urdhri i Bektashinjve në fatet e kombit tonë. “Ajo që mund t’iu them është se prej kaq shumë vitesh sa unë jam në këtë vorbull publike, jam mësuar që kur them diçka të re ose kur flas për një projekt të ri, dëgjoj shumë çudira, po si këtë herë, asnjëherë. Këtë herë kam dëgjuar dhe kam lexuar çudira të jashtëzakonshme, por gjëja që më ka habitur më shumë është që çfarë padije e jashtëzakonshme ekziston për Urdhrin e Bektashinjve. Unë shumë miqësisht do ju sugjeroja të gjithëve që të lexojnë dhe të informohen për Urdhrin e Bektashinjve. Çfarë përfaqëson në historinë e kombit tonë, çfarë roli ka pasur në fatet e kombit tonë dhe çfarë pasuri e madhe është për kombin tonë. Unë personalisht janë katolik, nuk janë mysliman, kam pas fatin që ta kem gruan myslimane, gjysmën më të mirë, kuptohet. Dy kalamaj i kemi ortodoks, sepse kështu i kemi pas ndërmarrjet e përbashkëta në të kaluarën. Në ndërmarrjen tonë të përbashkët kemi një çun, 10 vjeç do ta vendosi vet. Mund të thotë do bëhem budist, është në të drejtën e vet. Kështu që në këtë aspekt, të më thuash mua shtet islamik, po flet me një pjellë të imagjinatës, por jo me mua, e para. Kryeministri sqaroi se çfarë do të thotë krijimi i një entiteti sovran, ndërsa theksoi se përpos të mirave që do të sjellë nga pikëpamja e vizibilitetit, interesit, dhe atraksionit do ti shërbejë më shumë interesit kombëtar dhe trashëgimisë historike e kulturore.