"Një gjyq i padrejtë, i orkestruar nga Joe Biden. Nëse ma bëjnë këtë mua, mund t'ia bëjnë kujtdo". Këto janë fjalët e para të Donald Trump, në një konferencë për shtyp nga “Trump Tower” në Nju Jork, pas dënimit për çështjen e yllit të filmave për të rritur, Stormi Daniels. Republikani sulmoi gjyqtarin, duke e quajtur atë “të korruptuar” dhe “plot konflikte” interesash. Ish-presidenti më vonë u ankua se ai ishte nën një urdhër për të mos komentuar mbi gjyqin ndërsa ai kandidon për Shtëpinë e Bardhë. “Jetojmë në një shtet fashist. Unë po luftoj për vendin dhe për Kushtetutën. Është më e madhe se unë dhe presidenca ime. Ajo që më ndodhi mua nuk duhet të ndodhë me presidentët e tjerë në të ardhmen. E gjithë kjo është vepër e Bidenit dhe njerëzve të tij”, akuzoi Trump. Përgjigja e Presidentit Biden ishte e menjëhershme. “Trump kërcënon demokracinë dhe vë në pikëpyetje sistemin tonë të drejtësisë”, deklaroi ai. Ndërsa më pas shtoi se askush nuk është mbi ligjin, madje as Trump. “Ne duhet të ndalojmë Donald Trump, sepse të thuash se një gjyq është i montuar kur nuk na pëlqen vendimi është i rrezikshëm. Ajo që ndodhi në Nju Jork dëshmon se askush nuk është mbi ligjin. Trump u shpall fajtor për të gjitha 34 akuzat dhe tani mund të apelojë si të gjithë të tjerët”, u përgjigj Biden. Pamjet: AFP