Të tjera dokumente të klasifikuara u gjetën në një vend tjetër, pas atyre të zbuluara pak ditë më parë në një zyrë ku Joe Biden kishte punuar pas mandatit si zv/president. Gjetja e dokumentave ka ngjallur reagime të shumta megjithëse kreu i administratës amerikane u shpreh edhe vetë i befasuar nga gjetja e tyre dhe se ekipi i tij kishte ndërmarrë veprimet e duhura në përgjigje të situatës. Së fundi një gazetar e pyeti për dokumentet e reja, dhe Biden u shfaq i irrituar. “Materiale të klasifikuara pranë Corvettes tuaj, cfarë kishit në mendje? it ha reporter. “Dokumentet ishin të mbyllura në garazh, nuk po qëndronin jashtë në rrugë. Njerëzit e dinë se unë i marr shumë seriozisht materialet konfidenciale”, u shpreh presidenti, që shtoi se është duke bashkëpunuar plotësisht me hetuesit për këtë ngjarje. Në fillim të kësaj jave, Shtëpia e Bardhë konfirmoi se Departamenti i Drejtësisë po shqyrtonte "një numër të vogël dokumentesh të klasifikuara" të gjetura në zyrat e Qendrës Penn Biden, që zoti Biden i kishte përdorur pasi shërbeu si nënpresident nga viti 2017 deri pak para se të niste fushatën presidenciale në 2019. Fakti që dokumente të klasifikuara u gjetën në ambjente jopresidenciale, mund të shkaktojë shqetësime për presidentin, i cili e ka quajtur vendimin e ish-presidentit Donald Trump për të mbajtur qindra dokumenta të tilla në Mar-a-Lago "të papërgjegjshëm. " Kjo mund të ndërlikojë gjithashtu vendimin e Departamentit të Drejtësisë nëse do të ngrejë ose jo akuza kundër republikanit Trump, i cili ka pretenduar vazhdimisht se hetimi i departamentit për veprimet e tij përbënte "korrupsion". Pamjet: AFP