Një gjykatë në Turqi ka dhënë në total rreth 250 vjet burg për 37 të shpallur fajtorë si spiunë të Mossad-it izraelit, sipas dokumenteve të publikuara nga rrjeti arab The National. Dënimet vijnë teksa Turqia thotë se po shton fushatën kundër spiunëve të Izraelit në vend dhe redukton lidhjet, prej luftës brutale që po zhvillohet në Gaza. Dy prej të akuzuarve u dënuan kësaj jave me tetë vjet burg secili për “zotërim informacioni të ndaluar me qëllim spiunazhi”, sipas listës së akuzave në gjykatën kriminale në Stamboll. Ata kanë të dretën e apelit dhe koha e kaluar prapa hekurave do të llogaritet në dënim, shtojnë autoritetet. 35 të dënuarve të tjerë iu dhanë nga pesë vjet e gjashtë muaj burg secilit për të njëjtat akuza. Muajin e kaluar Turqia tha se kishte arrestuar një financier të Mossad në vend, shqiptarin nga Kosova Liridon Rexhepi, i cili kishte hyrë në vend më 25 gusht dhe u ndalua disa ditë më vonë nga anti-terrorizmi i Stambollit, pas sinjalizimit të inteligjencës turke. Burimet thanë asokohe se Rexhepi akuzohej për “spiunazh kundër shtetit”, me transferta parash për agjentët e Mossad në Turqi, që operonin me dronë ose kryenin “operacione psikologjike kundër interesave palestineze dhe të Sirisë.