Të paktën 30 persona u arrestuan nga policia ekuadoriane dhe ajo spanjolle si pjesë e një rrjeti të gjerë të trafikut të drogës. Gjatë aksionit u sekuestruan mbi 2.4 tonë kokainë, mbi 400 mijë euro, armë, automjete si dhe prona të ndryshme vlera e të cilave sipas mediave të Ekuadorit, shkon në rreth 13 milionë euro. Grupi dyshohet se drejtohet nga shqiptari Dritan Gjika. Person ky që ende nuk është prangosur, por që sipas shtypit të huaj, prej më shumë se 10 vitesh jeton në Ekuador dhe njihet për bizneset e shumta që ka në zotërim si dhe lidhjet me grupet kriminale. Sipas mediave ekuadoriane, Gjika merrej kryesisht me koordinimin dhe shitjen e ngarkesave të mëdha të lëndës narkotike në Europë. Por ai gjatë aksionit nuk u ndalua nga autoritetet, të cilat mundën të ekzekutonin 18 urdhër-arreste në Ekuador dhe 12 të tjera në Spanjë. Në konferencën e dhënë për shtyp, policia tha se Dritan Gjika mendohet se ndodhet në Turqi, por kjo ende e pakonfimruar. Sipas hetimeve, organizata kriminale dyshohet se përdorte blerjen e pasurive të paluajtshme, për pastrimin e parave nga trafiku i drogës.