Afrimi i sezonit të vjeljes së pemëve frutore ka rritur sfidat për fermerët në Greqi që nuk po gjejnë më fuqi punëtore për shkak të interesit të ulët të emigrantëve për të punuar në fermat greke. “Shqiptarët që jetojnë në Greqi edhe ata që kanë ardhur enkas për të punuar në të korrat e këtij viti, si dhe pakistanezët, kërkojnë të ardhura shtesë”, shkruajnë mediat greke. Punëtorët e bujqësisë janë larguar dhe Greqia kërkon fuqi punëtore, por jo nga vendet fqinje, pasi punëtorët shqiptarë, bullgarë, rumunë dhe polakë preferojnë tani të punojnë në Evropën Perëndimore, ku pagat ditore janë madje dy herë më shumë dhe kushtet e jetesës janë të shkëlqyera. Në këtë situatë Greqia po hedh sytë nga vende në Azi dhe konkretisht në Indi, Tajlandë dhe Vietnam. “Nevojat e Greqisë për krahë pune në bujqësi llogariten në 50,000-60,000 punëtorë, nga të cilët afërsisht 15,000 nevojiten vetëm për korrje. Megjithatë, këto nevoja nuk po plotësohen dhe marrëveshja e fundit ndërqeveritare e nënshkruar me Egjiptin për tërheqjen e punëtorëve në Greqi nuk i plotësojnë nevojat“, shkruan Protothema.