Malet, lumenjtë dhe bregdeti i jugut të Shqipërisë po zbulohen në një mënyrë krejt tjetër. Turistë nga vende të ndryshme të botës kanë zgjedhur të eksplorojnë natyrën shqiptare mbi kalë, duke përshkuar shtigje që i çojnë nga zonat malore deri pranë detit dhe rrjedhës së lumenjve. Për ta, kjo nuk është thjesht një shëtitje me kalë, por një eksperiencë që i afron me natyrën, peizazhin dhe vendet më pak të prekura nga turizmi masiv. “Unë mendoj se do të qëndroj këtu, edhe pse nuk jam europiane. Më pëlqen të shkoj kudo dhe të fotografoj Shqipërinë, sepse natyra është e mrekullueshme dhe magjepsëse. Të shohësh gjithë këto vende mbi kalë është një bukuri e veçantë.” “Po përpiqem të bëj udhëtime çdo vit dhe po kërkoja online për një udhëtim pesëditor në Europë. U surprizova kur gjeta mundësi kaq të mira për kalërim në Shqipëri. Nuk e mendoja se do të ishte një eksperiencë kaq e bukur, por tani e di që do të kthehem përsëri në Shqipëri” Nga mali te lumi e deri në det, turistët po zbulojnë një tjetër Shqipëri, atë që përjetohet ngadalë, mbi kalë dhe në kontakt të drejtpërdrejtë me natyrën.Një aventurë që për këta vizitorë nuk mbyllet me përfundimin e turit, por me dëshirën për t’u kthyer sërish në Shqipëri.