Shqipëria ka shënuar progres në matematikë dhe shkencë. Ky ishte konkluzioni i raportit TIMSS për vitin 2023, që ka si pjesë të administrimit vetë Shtetet e Bashkuara. Të dhënat që tregojnë trendin e arritjeve të nxënësve të klasave të katërta dhe të teta në 4 vite, nxjerrin Shqipërinë për herë të parë mbi mesataren ndërkombëtare në matematikë. 8% e nxënësve shqiptarë arritën nivelin e avancuar të aftësive, duke tejkaluar mesataren ndërkombëtare që është 7%; duke marr gjithsej 512 pikë. Nxënësit 10 vjecarë e renditën Shqipërinë në vendin e 33-të nga 58 shtete konkurruese, duke lënë pas vende si Kanadaja, Spanja, Belgjika, Franca, Mali i Zi, Maqedonia e Veriut, Kosova, Bosnja-Hercegovina. Ky vlerësim shfaq përmirësimin e njohurive të nxënësve shqiptarë në këtë lëndë, ku Shqipëria renditet nga 49 shtete me rezultate krahasuese të TIMSS 2019 në listën e 14 vendeve me rezultate në rritje në matematikë, dhe në listën e 15 në shkencë. Në prezantimin global, Shqipëria me një rritje prej 18 pikësh në matematikë dhe 3 pikësh në shkencë, u cilësua si një ndër shtetet me rritjen më të lartë të pikëve. Shqiptarët fituan 491 pikë në shkencë dhe u listuan në vendin e 34-të duke lënë pas shtete si Belgjika, Franca, Qiproja, Mali i Zi, Maqedonia e Veriut, Kosova, Bosnje-Hercegovina etj. Ky vlerësim u zhvillua për herë të parë në format digjital në Shqipëri dhe angazhoi 200 shkolla dhe 5143 nxënës të klasës së katërt.