Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell kryesoi takimin mes BE-së dhe ministrave të jashtëm të Ballkanit Perëndimor, duke shprehur mbështetje për avancimin e integrimit të rajonit, sa i përkët politikës së jashtme dhe sigurisë, përpara anëtarësimit. Në takimin e rëdësishëm në Bruksel ishte edhe ministri për Evropën dhe Punët e Jashtme të Shqipërisë Igli Hasani, i cili ka takuar edhe Komisionerin e Bashkimit Europian për Fqinjësinë dhe Zgjerimin, Oliver Varhelyi. Varhelyi shprehet se Shqipëria ka vazhduar të bëjë progres në reformat drejt integrimit në Bashkimin Europian. Ai shtoi se synimi është që deri në fund të këtij viti, Bashkimi Europian të hapë negociatat e anëtarësimit me Shqipërinë për kapitullin e parë. Në takimin e Ministrave të Jashtëm të vendeve anëtare të BE-së dhe vendeve të Ballkanit Perëndimor, Ministri Hasani konfirmoi përkushtimin e palëkundur të Shqipërisë në rrugëtimin e saj evropian, teksa nënvizoi se qeveria shqiptare po bën çmos për të përmbushur objektivat e vendosura nga BE. “Raporti i javës së kaluar nga KE konfirmon angazhimin e BE ndaj rajonit. Nëse BE forcon rolin e saj global në promovimin e sundimit të ligjit, suksesi i saj në rajonin tonë është vendimtar. Ka ardhur koha që Ballkani Perëndimor të jetë një partner në tavolinë, për të diskutuar sfidat e përbashkëta të sigurisë. Kemi nevojë për më shumë akses në organet e BE, për të përballuar kërcënimet e sigurisë”, u shpreh kryediplomati shqiptar. Në kohën kur rrisin bashkëpunimin me shtetet e rajonit të Ballkanit Perëndimor, nga BE-ja kërkohet që edhe brenda rajonit të ketë një bashkëpunim të madh dhe zgjidhje përmes dialogut dhe bashkëpunimit të problemeve që këto shtete kanë mes tyre. Kjo veçmas vlen për normalizimin e raporteve mes Kosovës dhe Serbisë, pasi sipas diplomatëve të BE-së, marrëdhëniet jo të mira mes këtyre dy shteteve e rëndojnë edhe situatën në tërë rajonin e Ballkanit Perëndimor. Pamjet: AFP