Gunther Fehlingher Jahn, aktivisti austriak që ka jetuar për disa vite në Shqipëri dhe mbështet fuqimisht anëtarësimin e vendit në Bashkimin Europian, në një intervistë ekskluzive për Top Channel ka renditur disa nga aspektet që i konsideron emergjente për t’u përmbushur në këtë proces. Sipas tij, reforma në drejtësi, lufta kundër korrupsionit në nivelet e larta politike dhe futja e monedhës euro janë ndër prioritetet ku duhet të përqendrohet Shqipëria. Fehlingher Jahn thekson se sfida kryesore e qeverisë duhet të jetë arritja e anëtarësimit në vitin 2029, në përputhje me zgjedhjet europiane, pasi viti 2030 do të përbënte një mandat të humbur për vendin. Ky shqetësim, shton ai, ia ka adresuar personalisht kryeministrit Rama gjatë një konference për investimet të mbajtur pak javë më parë në Vjenë.